Alkitab bahasa Betawi/Tukang Khotbah 9
Tukang Khotbah 9:1-12
Kematian Dateng ke Semuanye
1. Aye udah mikirin ini dalem-dalem di hati, makanye aye bisa bilang begini: orang-orang nyang bener, nyang bijak, ame kerjaannye, semuanya ada di tangan Tuhan. Orang mah kagak bakal tau nasibnye—itu cinta apa benci—cuman dari ngeliat ape nyang ada di depan mate.
2. Semua hal datengnye mirip-mirip ke semuanye: Satu kejadian nimpah nyang bener, nimpah juga nyang licik; Nyang lurus, kena juga nyang belok-belok; Nyang berkorban, sama aje kaya nyang kaga; Gimane nasib orang nyang bae, gitu juga nyang berdose; Orang nyang suka bikin sumpah, nasibnye sama aje ama nyang takut bikin sumpah.
3. Emang begini dah jahatnye dunia di kolongnye matahari: satu hal nyang sama kejadian ame semuanye. Bener dah, ati manusia tuh penuh ame kejahatan, ame kegilaan dari lahir sampe ajalnye. Abis itu, yaudah, pade koit.
4. Tapi buat nyang masih gabung ame golongan nyang idup, masih ade pengharapan. Soalnye, pan kata pepatah, "anjing nyang masih idup lebih mending daripada singa nyang udah koit."
5. Soalnye pan nyang masi idup tau klo die bakalan koit; Tapi nyang udah koit kaga tau ape ape: Dan die udah kaga ada terima imbalan lagi; Kenangannye aje ude dilupain.
6. Begitu juge ame cinta, benci, iri dengkinya die nyang udah koit, udah ilang semuanye; die ude kaga punye bagian apa-apa lagi ame apapun di kolong nya matahari.
7. Makanye, pegi dah, makan roti nyang enak, ame minum anggur dengan ati gembira, Soalnye Tuhan ude ridho ame kerjaan-kerjaan elu.
8. Terus pake baju noh nyang bersih, juga pala elu jangan ampe kekurangan minyak
9. Iduplah bahagie ame bini nyang elu sayangin di hari-hari nyang fana ini, di idup nyang Tuhan ude kasih di kolong matahari—semua idup elu nyang fana. Soalnye, itu udeh hak lu di idup ini, atas segala upaya nyang lu udah usahain di kolong matahari.
10. Apapun nyang tangan elu mesti kerjain, kerjain tuh semuanye pake semua daya upaya elu. Soalnye, di kuburan nyang nanti elu tuju, udeh kaga bakal ade kerjaan, kaga ade alat-alat, kaga ade pengetahuan, ape lagi hikmat.
11. Aye balik ngeliat di kolong matahari, begini keadaannye— Nyang larinye kenceng belom tentu menang lomba, Nyang kuat belom tentu menang perang, Nyang bijaksana belom tentu dapet rejeki buat makan, Nyang pinter belom tentu jadi tajir, Juga nyang punya keahlian belom tentu dapet keberpihakan; Soalnye, semuanye itu tergantung waktu ame kesempetan aje.
12. Soalnye, orang juga kaga bisa ngarti kapan waktunye tiba: Kaya ikan nyang tiba-tiba ketangkep di jaring kejam, Kaya burung nyang nyangkut di jebakannye, Begitu juge anak manusia sering kejebak ame waktu-waktu nyang jahat, Nyang tiba-tiba aje jatoh di atas die tanpa aba-aba.